|
Posted: 21 Sep 2013 10:06 AM PDT
 
ခရီးသွားမှတ်တမ်း(၂) ဟိုပုံး ထမ်းဆမ်းဂူ..
ဒီတခေါက်မြန်မာပြန်ခရီး ထွက်စဉ် ရှမ်းပြည်တောင်ပိုင်း တောင်ကြီးမြို့နဲ့ ၂၅မိုင်ခန့်ဝေးတဲ့ ပအိုဝ်းကိုယ်ပိုင် အုပ်ချုပ်ခွင့်ရဒေသမှာ တည်ရှိတဲ့ ထမ်းဆမ်းဂူကို ရောက်ရှိခဲ့တဲ့ အကြောင်းလေးပါ..။ ရှမ်းပြည်တောင်ပိုင်း တောင်ကြီးမြို့ရဲ့ အလှကို မနက်စောစော ရွှေဘုန်းပွင့် စေတီပေါ်က ကြည့်ရှုခဲ့ရပြီး သကာလ.. တောင်ကြီးက မိတ်ဆွေရဲ့ ကောင်းမှုနဲ့ ရင်သပ်ရှုမောဖွယ် ထမ်းဆမ်းထုံးကျောက် လှိုဏ်ဂူကို ရောက်ခဲ့ပါတယ်..။ တောင်ကြီးက ဟိုပုန်းထိ ၁၂မိုင်၊ ဟိုပုန်းကနေ ၁၄မိုင်လောက် ထပ်သွားရင် ပအိုဝ်းကိုယ်ပိုင် အုပ်ချုပ်ခွင့်ရဒေသမှာ တည်ရှိတဲ့ ထမ်းဆမ်းဂူကို ရောက်ပါတယ်...။ လမ်းတွေကလည်း ယခင်နဲ့မတူ ပုဂ္ဂလိကကို လုပ်ပိုင်ခွင့် ပေးထားတဲ့ အတွက်ဖြောင့်ဖြူးသာယာနေလို့ ၁နာရီကျော်ကျော် လောက်အတွင်းမှာ ရောက်ရှိသွားပါတယ်...။
လမ်းခရီးမှာတော့ ၂၀၁၁ခုနှစ်က ကျွန်တော့်ဆီ တိုင်စာတွေ ရောက်လာဘူးတဲ့ ပင်းပက်သံမဏိစီမံကိန်းကို တွေ့ခဲ့ရလို့ ပြုံးမိပါသေးတယ်..။ တောင်ကြီး ဟိုပုန်းလမ်းဟာ အင်မတန်မှာ သာယာလှပတဲ့ မြင်ကွင်းတွေနဲ့ ပြည့်နှက်နေလို့ ကင်မရာကို အလွတ်မပေးနိုင်ပဲ မှတ်တမ်းတွေ တပွေ့တပိုက်နဲ့ပေါ့။ တုခတော့ ပြောချင်သည် ကျွန်တော်တို့ နိုင်ငံမှာ ဆိုင်းဘုတ်တွေမှာ ဆောင်ပုဒ်တွေ လုပ်ဆောင်ချက်တွေကတော့ ပျံလန်ထွက်နေတာပါပဲ..။ ဥပမာ အနေနှင့် ဥတုရာသီ တောကိုမှီတို့ သစ်ပင်ခုတ်က ထောင်ဒဏ်(၃)နှစ်တို့ ဘာတို့ စသည့် ဆိုင်းဘုတ်များ တောင်ပေါ်မြို့များရဲ့ မြို့အဝင် မြို့အထွက်များမှာ အစီအရီမြင်နေရပါတယ်..။
ထို့ကြောင့်လားမသိ မြို့အဝင် မြို့အထွက် လူမြင်ကွင်းများတွင် သစ်ပင်များ စိမ်းစိမ်းစိုစို စိုစိုပြေပြေမြင် တွေ့နေရသော်လည်း မြို့နဲ့ ဝေးတဲ့ နေရာများမှာတော့ တောင်ကတုံးများ နေရာအနှံ့ပေါ့..။ နီးရာလူမြင်ရာ သစ်ပင်များ စိုက်နေကြသလားလို့ပါ..။ ဓာတ်ပုံရိုက်လိုက် ပြင်ပ ရှုခင်းတွေ ကြည့်လိုက်နဲ့ ရောက်လို့ ရောက်မှန်းမသိ ၁နာရီကျော်ကျော်လေးမှာ ရောက်ရှိခဲ့ပါတယ်..။
ရင်သပ်ရှုမောဘွယ်ရာ ထမ်းဆမ်းထုံးကျောက်ဂူဟာ ရှေးယခင်ကတည်းက ဟိုပုံး၊ လွိူင်လင်လမ်းဘေးမှာ ရှိပေမယ့် မည်သူမျှ မသိရှိခဲ့ပါဘူး။ လိုက်ပို့တဲ့ ဒေသခံရဲ့ ပြောပြချက်အရ ၂၀၀၉ခန့်က ဟိုပုံးကိုရင်လေး(ရှင်ပေါရိသ)ရဲ့ အိပ်မက်အရနဲ့ နွားကျောင်းသားလေးတဦးမှ တွေ့ရှိခဲ့ပြီး ယခုကဲ့သို့ လူအများကြည့်ရှုနိုင်အောင် (ဟိုပုံးကိုရင်လေး)နဲ့ ဒေသံခံတွေရဲ့ ကြိုးစားမှုနဲ့ ဖွင့်လှစ်ပေးခဲ့တယ်လို့ သိရပါတယ်..။
ထမ်းဆမ်းဂူရဲ့ ထူးခြားချက်ကတော့ ကျွန်တော် ရောက်ရှိခဲ့တဲ့ မေမြို့ပိတ်ချင်းမြှောင်တို့၊ ပင်းတယဂူတို့နဲ့ မတူပဲ အထဲမှာ ရင်သပ်ရှူမောဖွယ်ရာ ကျောက်စက်ပန်းဆွဲများနဲ့ အင်မတန်မှ လှပကျယ်ဝန်းလှတဲ့ သက်တမ်းရင့် ဂူတခုဖြစ်တာပါပဲ..။ ကျောက်စက်ပန်းဆွဲတို့ရဲ့ ပုံသဏ္ဍာန်အမျိုးမျိုးဖြစ်နေတဲ့ မြင်ကွင်းအလှကတော့ စာဖွဲ့မပြတတ်အောင်ပါပဲ။ ဂူထဲမှာတော့ မိုးတွင်းကာလဖြစ်တဲ့ အတွက် ရေထွက်ပေါက်မှ ရေးများတဝေါဝေါ ထွက်လာတဲ့ အသံကတော့ ဂူထဲမှာ ပဲ့တင်သံထွက်နေပြီး ဂူထဲမှ ကြီးမားတဲ့ ရေထွက်ပေါက်ကလည်း အံ့သြစရာပါ..။
ယခင်ကနိုင်ငံခြားသားများ လာရောက်ခွင့် မရခဲ့ပေမယ့် မကြာမှီကမှ နိုင်ငံခြားသားတွေ အတွက် ဖွင့်ပေးထားပုံရပါတယ်..။ နိုင်ငံခြားသားတွေ ဒီထက်ပိုမို သိရှိပြီး ထမ်းဆမ်းဂူကို လာရောက်လေ့လာခွင့် ရမယ်ဆိုရင် ဒေသဖွံ့ဖြိုးရေးအတွက် သာမက ကမ္ဘာကပါ သိရှိခွင့်ရကြမှာပါ..။ ကြီးမားပြီး သက်တမ်းရင် ထုံးကျောက်ဂူ ဖြစ်တဲ့ အတွက် နိုင်ငံခြားသားများနဲ့ ပြည်ပ ဘူမိဗေဒပညာရှင်များ အတွက် အင်မတန်မှ စိတ်ဝင်စားမှုကို ပေးနိုင်မှာ ဖြစ်ပါတယ်..။ ထို့အတွက်ကြောင့်လည်း ထမ်းဆမ်းဂူကို ထိန်းသိမ်းရာမှာ ဘာသာသာသနာ အတွက် စေတီတော်တွေ တည်ထား ကိုးကွယ် ထိန်းသိမ်းမှုအပြင်.. (ပညာရှင်များရဲ့ အကူအညီနဲ့ သဘာဝကျောက်စက်တွေရဲ့ အလှ အပတွေပါ မကွယ်ပျောက်ရအောင် ထိန်းသိမ်းသင့်တယ်လို့ ယူဆမိပါတယ်..)။ ဘူမိဗေဒပညာရှင်တွေ အတွက် အင်မတန်မှ အဖိုးထိုက်တန်လှတဲ့ သက်တမ်းရင့် ဂူတခု ဖြစ်နေလို့ပါပဲ..။
ဒီလိုကြီးမားပြီး သက်တမ်းရင့် လှတဲ့သဘာဝဂူမျိုးသာ အိမ်နီးချင်းနိုင်ငံတွေမှာ ရှိရင် နိုင်ငံခြားသားတွေနဲ့ သဘာဝပတ်ဝန်းကျင် မြတ်နိုးသူတွေ ခြေချင်းလိမ်နေကြမှာပါ..။ ကျွန်တော်တို့ နိုင်ငံဟာ ဒီလို အဖိုးတန် သဘာဝအလှတွေ အများအပြားပိုင်ဆိုင်ထားပြီး အရှေ့တောင်အာရှမှာ သဘာဝအလှတွေ အများအပြား မပျောက်ပျက် တည်ရှိနေသေးတဲ့ နိုင်ငံတခုအဖြစ် တည်ရှိနေသေးတာပါ..။ နိုင်ငံတော်အနေနဲ့ အဆိုပါဒေသကို နိုင်ငံခြားသားများ လွယ်ကူစွာ လာရောက်နိုင်ဖို့နဲ့ ထမ်းဆမ်းဂူ အကြောင်းကို ပြည်တွင်းပြည်ပသိအောင် လုပ်ဆောင်မှုနဲ့အတူ အဖိုးတန်သဘာဝကျောက်စက်တွေရဲ့ အလှကို ဒေသခံတွေနဲ့အတူ ထိန်းသိမ်း စောင့်ရှောက်ဖို့ ရိုးသားစွာ အကြံပြုအပ် ပါတယ်..။
ဂူတွင်းမှာ ဓာတ်ပုံပေါင်းများစွာ မှတ်တမ်းတင် ရိုက်ကူးပြီး ပြန်ထွက်လာချိန်မှာတော့ တမူးရလို့ တပဲလှူ တို့ရှမ်းတောင်သူ တူနိုင်ယိုးလားလို့ ဆိုသလို ရှမ်း ပအိုဝ်းတွေရဲ့ အလှူဒါနပြုနေကြတဲ့ မြင်ကွင်း၊ ရိုးရာဝတ်စုံ ဆင်မြန်းထားတဲ့ ရိုးသားတဲ့ ပအိုဝ်းအမျိုးသမီးတွေနဲ့ သဘာဝကျောက်ဆောင်၊ ဂူပတ်ဝန်းကျင် ရေထွက်ပေါက်က အရှိန်ပြင်းပြင်းနဲ့ စီးဆင်းနေတဲ့ ချောင်းငယ်လေးအပြင် အေးမြကြည်လင်တဲ့ ရာသီဥတု အလှတို့ဟာ ပန်းချီကား တချပ်လိုပါပဲ...။ စာဖတ်သူများ အနေနဲ့လည်း ရှမ်းပြည်တောင်ပိုင်း ဟိုပုံးမြို့နယ်ထဲက ကျောက်စက် အလှတွေ ပြည့်နေတဲ့ သဘာဝထုံးကျောက်လှိုဏ်ဂူဖြစ်တဲ့ သက်တမ်းရင့် ထမ်းဆမ်းလှိုဏ်ဂူကြီးကို တခါတခေါက် အရောက်သွားပြီး တို့ပြည်တို့မြေက မိမိနိုင်ငံရဲ့ သဘာဝအလှတွေကို ခံစားမှတ်တမ်းတင်ကြဖို့ အကြံပြုရင်း...
ဒီမိုဝေယံ
ဓာတ်ပုံ ဒီမိုဝေယံ
                  |
| You are subscribed to email updates from ဒီမိုဝေယံ To stop receiving these emails, you may unsubscribe now. | Email delivery powered by Google |
| Google Inc., 20 West Kinzie, Chicago IL USA 60610 | |
--
http://www.burmaburo.blogspot.com
No comments:
Post a Comment