''သေပြီဆရာ''

'သေပြီဆရာ''

by Soe Min on Monday, 04 July 2011 at 20:43

                      မြန်မာကားတွေထဲမှာ မျက်ကွင်းညိုညို နှုတ်ခမ်းဖျော့ဖျော့နဲ့ လူနာကလေးက
ချောင်းလေးတဟွတ်ဟွတ်ဆိုးပြီး မှာချင်တာတွေ မမောနိုင်မပန်းနိုင်မှာလို့အပြီးမှာ အနားကနှာရည်တွေတောက်တောက်ကျအောင်ငိုနေတဲ့ လူနာစောင့်က အလန့်တကြား လူနာနာမည်ကို
တ တပြီးငိုလိုက်ရင်း ''ဆရာ..ကယ်ပါဦးဆရာရယ်'' လို့ ပြောလာတဲ့အခါ ရုပ်တည်ကြီးနဲ့ ဆရာဝန်ဆိုတဲ့လူက
အသာလေး ခေါင်းရမ်းပြလိုက်ရင် ရပါပြီ။ တကယ့်တကယ် အပြင်လောကမှာ အသက်ထွက်သွားတဲ့
လူနာရှေ့မှောက်မှာ ဆရာဝန်တစ်ယောက်အနေနဲ့  တကယ်ကြီးသရုပ်ဆောင်ရတဲ့အခါမှာ ထင်သလောက်မလွယ်ပါဘူး။ ၀ါဝါ၀င်းရွှေကားကြည့်၊ မြင့်မြတ်ဗီဒီယိုကြည့်ပြီး လိုက်ငိုတတ်ကြတဲ့ မြန်မာလူမျိုးတွေဟာ အရှင်လတ်လတ်ကြီးကနေ အသေကောင်ပူပူနွေးနွေးကြီးဖြစ်သွားတဲ့ လူနာရှေ့မှာ ယူကြုံးမရ ပူဆွေးသောကရောက်နေရှာသူတွေကို တွေ့ရတဲ့အခါ
နှလုံးမသာမယာဖြစ်ရတာကတော့ သေချာတာပေါ့။ ဆရာဝန်တွေအဖို့မှာကျတော့ လူနာကရော လူနာရှင်ကရော နောက်ဆုံးကောက်ရိုးမျှင်လေးအဖြစ် ဆွဲမိဆွဲရာ လှမ်းဆွဲ အားကိုနေကြတဲ့အခါ
နှလုံးမသာမယာတာအပြင်မှာ ''ငါ ဘာမှလုပ်ပေးလို့ မရလိုက်ပါလား'' ဆိုတဲ့ နောင်တလည်း ပါနေပြန်ပါတယ်။
သူတို့ အသက်မွေးမှုက ဒီလိုအဖြစ်အပျက်မျိုးတွေမှာ ရအောင်ကယ်တင်နိုင်တယ်ဆိုတဲ့ ပီတိအပေါ်မှာ
အတ္တကိုတည်ဆောက်ထားတာမို့ ကိုယ့်လူနာတစ်ယောက် သေတိုင်း အတ္တပုံဆောင်ခဲတွေ
ပဲ့ကြွေသွားသလို ခံစားရပါတယ်။ ဘယ်ဆရာဝန်ကမှ အလောင်းစည်သူဘွဲ့ကို မလိုချင်ဘူးလေ။
ကျော်သူတို့ မသန်းမြင့်အောင်တို့နဲ့တောင် အရမ်းခင်သွားမှာစိုးလို့ ခပ်စိမ်းစိမ်းနေပါ့မယ် လုပ်နေကြတာ။
ဘယ်လိုပဲ ရှောင်နေနေပါလေ။ တနေ့မဟုတ်တနေ့တော့ တွေ့ကိုတွေ့ရမှာပ။
လူနာက ကိုယ့်ကို ''သေပြီဆရာ'' လို့ မတ်စိပို့လိုက်တဲ့အခါ ဆရာဝန်ဘက်ကတော့ အဆင်သင့်ဖြစ်နေအောင် ပြင်ဆင်ထားစရာတွေရှိပါတယ်။

                     ပထမဦးဆုံးအလုပ်ကတော့ လူနာတကယ်သေဆုံးပြီဆိုတာကို အတည်ပြုပေးရပါတယ်။
အတည်ပြုချက်ပေးလိုက်တာနဲ့ အချိန်၊ နာရီပါ မှတ်ပေးရတာပေါ့။ လူတစ်ယောက်မွေးဖွားလာတဲ့အခါ
နေ့ရက်အချိန်တွေမှတ်သလိုပဲ သူသေဆုံးသွားတဲ့အခါ မှတ်ပေးလိုက်ရတာပေါ့။ ဒါလည်း လွယ်လွယ်လေးလို့
မမှတ်လိုက်ပါနဲ့လေ။ လူနာရှင်တွေကသူတို့ချစ်တဲ့လူနာ သေသွားပြီလို့ လွယ်လွယ်နဲ့ လက်မခံနိုင်သေးတာ ရှိတတ်ပါတယ်။
''ဟုတ်ရဲ့လားဆရာရယ်။ သေချာပြန်စမ်းသပ်ပေးစမ်းပါဦး'' လို့ ပုခုံးကြီးကို လာလာဆွဲခါပြီး ပြောလိုက်၊
အလောင်းကြီးကိုဖက်ပြီးငိုလိုက်နဲ့ မပြီးနိုင်မစီးနိုင် လေးငါးခါကျော့နေလို့ စိတ်တိုလာခဲ့ဖူးပါတယ်။
ရုပ်ရှင်ရိုက်ရင်တောင် အဲဒီတစ်ကဒ်ထဲ လေးငါးခါပြန်ရိုက်နေရရင် ဘယ်လိုနေမလဲ စဉ်းစားကြည့်။
တခါတုန်းကတော့ အဲဒီဇာတ်လမ်းမျိုးဖြစ်နေတုန်း အသက်ကုန်ပြီလို့ အတည်ပြုထားတာ
နာရီဝက်လောက်ရှိနေပြီဖြစ်တဲ့ အလောင်းကြီးရဲ့လက်တွေဟာ ကွေးလိုက် ဆန့်လိုက်နဲ့
ချိုမိုင်မိုင်ကပြနေတော့မှ ဖက်ငိုနေတဲ့သူလည်းထွက်ပြေး၊ ကိုယ်လဲ တအံ့တသြ တကယ်သေတာ ဟုတ်မဟုတ်
ပြန်စမ်းရပါတယ်။ သေတာတော့ သေချာပါတယ်။ အကြောမသေသေးတာနေမှာ။ အခေါင်းထဲရောက်မှ
ပြန်နိုးတယ်ဆိုတာမျိုး မဖြစ်ရလေအောင် ကိုယ့်ဘက်က သေချာသထက်သေချာအောင် စမ်းသပ်စစ်ဆေးရပါတယ်။

                     လူနာသေဆုံးကြောင်း အတည်ပြုပြီးရင် တဆက်တည်း မှတ်ချက်ပေးရတာကတော့
သေဆုံးရခြင်းအကြောင်းအရင်းပါပဲ။ စာအုပ်ထဲမှာသင်တယ်။ မယ်သီတာခိုးတာဘယ်သူလဲ လို့မေးရင် ကျွန်တော်မခိုးပါဘူးလို့ဖြေသလိုမျိုး လူနာဘာကြောင့်သေရသလဲလို့ မေးတဲ့အခါ ကျွန်တော်မသတ်ပါဘူးလို့
ဖြေလိုက်လို့မရသလို၊ ထင်တာတွေလျှောက်ခေါင်းစဉ်တပ်လို့လည်းမဖြစ်၊
မသိပါလို့ ဖြေလို့လဲမရ။ ပုလိပ်တွေ အမှုမပေါ်တဲ့အခါလုပ်တာပဲလို့ ပြောကြတဲ့ ၀ိဥာဉ်ခေါ်မေးတာမျိုးလည်း
လိုက်လုပ်လို့မရ။ ခက်လိုက်တာနော်။ ဘူတန်မှာတုန်းကတော့ သူတို့ဆီကဆရာဝန်အသစ်ကလေးတွေက
ဆေးရုံမှာ ဘာကြောင့်မှန်းမသိပဲ လူနာသေသွားရင် အလွယ်တကူကောက်တပ်လိုက်တဲ့ရောဂါတစ်ခုရှိတယ်။
ALD(Alcoholic Liver Disease)အရက်ကြောင့်ဖြစ်သော အသည်းရောဂါတဲ့။
ဘယ်လောက်အတပ်ကောင်းသလဲဆို ငါးယောက်သေရင် လေးယောက်က အဲဒီရောဂါဖြစ်နေလို့
သေစာရင်းထိန်းသိမ်းတဲ့ဆီက ထုချေလွှာအတောင်းခံရရော။ ကိုယ့်ဆီမှာလဲ ဒါမျိုးတွေအများကြီးရှိပါတယ်။ ဒီထက်ထူးဆန်းတာတွေတောင်ရှိသေး။ ရောဂါနာမည် တိတိကျကျကြီးသိလျက်နဲ့ စကားဦးတောင်
သမ်းလို့မရတာတွေအများကြီး။ ဥပမာ မွေးကင်းစကလေး မေးခိုင်ရောဂါလို့ တပ်ကြည့်လိုက်ပါ့လား။
ပြည်နယ်ကျန်းမာရေးဌာနကြီးတစ်ခုလုံး မိုးမီးလောင်သွားမှာစိုးလို့ စာအုပ်ရော
မှတ်တမ်းပါ အသစ်ပြန်ရေးပေးရလိမ့်မယ်။ ရင်ခွဲစစ်ဆေးမှတ်တမ်းမှာတောင် သေနတ်ဒဏ်ရာလို့
ရေးလို့မရတာတွေရှိတယ်လေ။ ကိုယ်တိုင်မြင်ရတာမှမဟုတ်ပဲ။

                        ဒီလိုတိတိကျကျသိတာတွေ့တာတွေကိုတောင် အကြောင်းကြောင်းတို့ထောက်ထားလို့
မပေါက်ကြားအောင် ထိန်းသိမ်းထားရတဲ့ကျင့်ဝတ်တွေရှိတယ်ဆိုရင် ကိုယ်တိုင်မသေချာပဲနဲ့ စိတ်ထဲကအထင်နဲ့
ဒီလူနာသေဆုံးရတာမှာ ဘယ်ဆရာဝန်လုပ်လိုက်လို့။ ဒါမှမဟုတ် ဘာမလုပ်လိုက်မိလို့ စတဲ့ စွပ်စွဲချက်၊
ထင်မြင်ချက်တွေကို ကျန်ရစ်သူ လူနာရှင်ရှေ့မှာ မပြောမိအောင် ထိန်းသိမ်းဖို့ လိုတယ်လို့ရော မထင်ဘူးလားဗျာ။
အဲဒါ ဆရာဝန်တွေ ထိန်းသိမ်းရမယ့် ကျင့်ဝတ်သိက္ခာထဲမှာ ပါပါတယ်။ မေ့နေမှာစိုးလို့ သတိပေးတာပါနော်။
ဘယ်သူတွေဘယ်တုန်းက ဘာတွေဖွသွားတယ်လို့ ထပ်ပြီးမဖွချင်တော့ပါဘူး။ သေတဲ့လူက
သေပြီလေ။ သေပြီဆရာကနေ ဆရာသေပြီ မဖြစ်အောင် အလျှောက်ကောင်းမှ အထောင်းသက်သာမယ့်
အခြေအနေတွေလည်း ရှိတတ်ပါတယ်။

                           ကျွန်တော်တို့ရဲ့ ပါမောက္ခဆရာကြီးများဟာ မြန်မာတစ်နိုင်ငံလုံးက မနိုင်လို့ လွှဲပို့လိုက်ရတဲ့
မနိုင်ရင်ကာ ရောဂါသည်များကို နောက်ထပ်တဖန်လွှဲစရာမကျန်တော့ပဲ ရှိသမျှ ပညာကုန်သုံးလို့ စွန့်စွန့်စားစား
ခွဲစိတ်ကြရပါတယ်။ နဂိုက ရောဂါရှုပ်ထွေးဆန်းပြားလွန်းလို့ မျက်ကလဲဆန်ပြာ လူနာရော ဆရာပါ မျက်ဖြူဆိုက်အောင်ခွဲစိတ်ရတဲ့လူနာများဟာ အဖိတ်အစင်လဲ များတတ်တယ်ဆိုတာ နားလည်နိုင်ပါလိမ့်မယ်။
မလွှဲမရှောင်သာ ဘယ်လိုမှမတတ်နိုင်တော့တဲ့အခါ ခွဲခန်းထဲမှာတင် အသက်ဆုံးသွားတဲ့လူနာတွေလည်း ရှိလာတတ်ပါတယ်။ ဒီအခါမျိုးမှာ ခွဲခန်းအပြင်ဘက်က မျှော်လင့်တကြီး စောင့်နေကြတဲ့ လူနာရှင်တွေကို ဘယ်မျက်နှာနဲ့ ရှင်းပြကြမလဲဆိုတာ လွယ်ကူတဲ့ပြဿနာမဟုတ်ပါဘူး။ ကျွန်တော့ဆရာကြီးတစ်ယောက်ကတော့ အဲလိုမျိုးဖြစ်လာရင်တည်တည်ငြိမ်ငြိမ်နဲ့ သူကိုယ်တိုင်ထွက်ပြီး ရှင်းပြပါတယ်။ လူနာနဲ့ ရောဂါအခြေအနေနဲ့ ခွဲစိတ်ဖို့ပြင်ဆင်ထားတာက
ဘယ်လိုအနေအထား(မခွဲခင်ကတည်းက ရှင်းပြီးသားပါ) ခွဲစိတ်နေစဉ်မှာ ဒီလိုဒီလို အခြေအနေတွေကြောင့်
နောက်ဆုံး ဒီလိုဒီလိုဖြစ်သွားပါတယ်။ စိတ်မကောင်းပါဘူး။ ကျွန်တော်တို့ တတ်နိုင်ဆုံးကြိုးစားခဲ့ပါတယ်...
စသဖြင့် ကျေနပ်သည်အထိ အေးအေးဆေးဆေး ရှင်းပြပါတယ်။ ခြေကုန်လက်ပန်းကျအောင် အသည်းအသန်
ခွဲစိတ်ပြီး မမောနိုင် မပန်းနိုင် အေးအေးဆေးဆေး ရှင်းပြရတဲ့အကြောင်းကတော့ ''မင်းတို့ကိုထွက်ရှင်းခိုင်းလို့ မဖြစ်ပါဘူး။ မင်းတို့ပြောမှာက ခင်ဗျားတို့လူနာလေ ဆရာကြီးတွေခွဲလိုက်တာ ရှောသွားပြီဗျ။ သွေးတွေထွက်လိုက်တာမှ မတရား။
အခု သေပြီလေ။ ခုံပေါ်မှာတင်သေတာဗျလို့ပြောမှာ။ စိတ်ချရတဲ့ကောင်တွေမဟုတ်ဖူး'' လို့ ရယ်ရယ်မောမောပြောလေ့ရှိပါတယ်။ ဒါလည်း လေ့လာမှတ်သားထားသင့်တဲ့ ပညာပါပဲ။ ကိုယ်လုပ်ထားတဲ့ အလုပ်တစ်ခု ကောင်းတာပဲဖြစ်ဖြစ်။ ဆိုးတာပဲဖြစ်ဖြစ်။ ပြီးအောင်တော့ လက်စသတ်ရဦးမယ်မဟုတ်လား။

                       ဆရာဝန်ဆိုတာမျိုးက ရှင်မယ့်လူနာတွေကိုချည့် ရွေးကုလို့မရသလို ကိုယ်ကုသမျှလူနာတိုင်းဟာ
ရှင်ကို ရှင်ရမယ်လို့လဲ မျှော်လင့်ထားလို့မရပါဘူး။ မတတ်သာလို့ လက်လျှော့လိုက်ရတဲ့အခါမှာ တခြားအလုပ်တွေလို
တော်ပြီ၊ မလုပ်ချင်တော့ဘူး၊ ဒီနေရာတင်ရပ်တယ်လို့ လုပ်လို့မရပါဘူး။ ကုမရလို့ သေဆုံးသွားရမယ့်လူနာကို
သိက္ခာရှိရှိ(with Dignity) တည်တည်ငြိမ်ငြိမ် သခြင်းတရားကို ရင်ဆိုင်နိုင်ဖို့ ကူညီရပါဦးမယ်။ စစ်အတွင်းမှာ ဒဏ်ရာရလို့ သေလုမျောပါးဖြစ်နေတဲ့ စစ်သားတွေကို မရှင်နိုင်တော့ဘူး ထားပစ်ခဲ့လို့ လုပ်လို့မရသလိုပါပဲ။
''ရောဂါကျွမ်းနေပြီ။ ကုလို့မရတော့ဘူး။ အလွန်ဆုံးခံ ဘယ်လောက်ဘယ်လောက်ပဲနေရတော့မှာ။ အိမ်ပြန်သယ်သွားပါလား'' လို့ ကိုယ့်လက်ကလွတ်အောင် အတင်းတွန်းပို့လို့မရပါဘူး။ တချို့နိုင်ငံတွေမှာတော့ အဲလိုလူနာမျိုးတွေကို
ကာယကံရှင်ရဲ့ ဆန္ဒအလျောက် ညင်ညင်သာသာသက်တမ်းကုန်ဆုံးခွင့်ရအောင်ကူညီတဲ့
ယူသာနာဆီဆိုတာ နိုင်ငံတော်တော်များများမှာတော့ လူသတ်မှုအဖြစ်နဲ့ပဲ မြင်နေပါသေးတယ်။
လူ့အသက်ဆိုတာ ဘုရားသခင်မှတပါး ကစားခွင့် ဆုံးဖြတ်ပိုင်ခွင့် မရှိဘူးတဲ့။ မြန်မာပြည်မှာဆိုရင်တော့''ဆရာရယ်၊ အသက်ကယ်ဆေးလေး ထိုးပေးပါဦး'' ''သက်တောင့်သက်သာလေး အသက်ထွက်အောင်ဆေးပေးပါဦး''
''သူ့မြေးလေးက မနက်ဖြန်မှရောက်မှာမို့ တစ်ရက်လောက်ဆွဲထားပေးပါဦး'' စသဖြင့် မဟုတ်ကဟုတ်ကတွေ
ပူဆာလေ့ရှိကြပါတယ်။ ဆရာဝန်ရဲ့ ၀တ္တရားက အဲဒီမှာမရှိပါဘူး။ သူလုပ်ရမှာ လူနာခံစားနေရတဲ့ ဝေဒနာတွေ အထိုက်အလျောက်သက်သာအောင် ကူညီနိုင်သလား။ မကူညီနိုင်လည်း ကိစ္စမရှိပါဘူး။
အချိန်တစ်ခုရောက်ရင်လူနာကိုယ်တိုင်လည်း သူ နာသလား မနာဘူးလား မခံစားနိုင်တော့ဘူး။
ဘယ်လိုပဲဖြစ်ဖြစ် လူနာရဲ့ နောက်ဆုံးအချိန်မှာတော့ ဆရာဝန်၊ ဒါမှမဟုတ် ကျန်းမာရေးဝန်ထမ်းတစ်ဦးဦးရဲ့ လက်တကမ်းမှာရှိနေတာဟာ လူနာအတွက် မကျိုးမထူးရင်တောင် ကျန်ရစ်သူမိသားစုအတွက် နောင်တကင်းတဲ့
ဖြေသိမ့်မှုတစ်ခုကို ပေးစွမ်းနိုင်ပါတယ်။ လူနာရဲ့ နောက်ဆုံးဆန္ဒကိုက မိသားစုနဲ့အတူ အိမ်မှာပဲ
အသက်ကုန်ချင်တာဆိုရင်တော့ တမျိုးပေါ့။ လူတစ်ဦး တစ်ယောက် အနိစ္စရောက်သွားတဲ့အခါမှာ ကျန်ရစ်သူမိသားစုအနေနဲ့ ကိုယ်စိတ်နှလုံး ဆင်းရဲဒုက္ခရောက်စရာ အကြောင်းအရာတော်တော်များများ ရှိပါတယ်။
အဲဒီအကြောင်းအရာပေါင်းစုံတွေကြားထဲမှာ ဆရာဝန်တွေကလည်းတမျိုးလို့ နတ်သျှင်သူ့ကြောင့် တရေးမမှောင့်စေချင်ပါဘူး။
အဲဒီလိုမဖြစ်စေဖို့အတွက် ဆရာဝန်တွေဘက်ကလည်း ညက်ညက်ညောညောနဲ့ ကိုင်တွယ်ဖြေရှင်းတတ်ဖို့လိုတယ်ဆိုတာကို သတိပြုမိစေချင်လို့ သေချင်စော်နံသွားလောက်အောင် သေခြင်းရဲ့တံခါးများကို ခေါက်နေရပါတယ်။ လူနာတွေပို့ပို့ပေးတိုင်းသာ
သေမင်းဆီက ကော်မရှင် ရရရင်ဖြင့် အသက်ရှည်ရချေသေးရဲ့နော်။
http://www.facebook.com/note.php?note_id=10150370360698902

´ဂျာနဂျိုချာဝန်ဂျီး´

by Soe Min on Sunday, 17 July 2011 at 16:07

          မဟာရန်ကုန်ရွှေမြို့တော်ကြီးက နံမည်အကြီးဆုံးနဲ့ ဈေးအကြီးဆုံး အထူးကုဆေးခန်းကြီးတစ်ခုမှာ ဂျာနယ်လစ် သတင်းထောက်ကလေးတွေ ခြေချင်းလိမ်နေပြိး အကြောင်းအမျိုးမျိုးကြောင့် နစ်နာသွားရတဲ့လူနာတွေကိုယ်စား ဂျာနယ်ထဲကနေ သတင်းတွေဖော်ပြနေတဲ့အတွက် အဲဒီဂျာနယ်ကို ဆေးခန်းဘက်ကနေ တရားစွဲလိုက်တယ်လို့ သတင်းကြားလိုက်ရပါတယ်။ ဒါဟာ ကောင်းတဲ့လက္ခဏာ ကြိုဆိုထိုက်တဲ့ လက္ခဏာပါပဲ။ ဂျာနယ်တွေဟာ အင်အားနည်းသော်လည်း မှန်ကန်တဲ့ဘက်ကနေ ရဲရဲဝံ့ဝံ့ရပ်တည်တဲ့သဘောပေါ့။ ဒီအတိုင်းသာဆို နောက်ကို ငါတို့နိုင်ငံမှာ တရားလက်လွတ်အနိုင်ကျင့်မှုတွေ ဘယ်ရှိတော့မလဲ။ ကောင်းလိုက်တာကွယ်။ အဲသလိုသတင်းထောက်မျုိုးတွေကို နေပြည်တော် မန္တလေးစတဲ့ မြို့တိုင်းရွာတိုင်းနဲ့ ဌာနဆိုင်ရာတွေမှာ၊ အများပြည်သူနဲ့သက်ဆိုင်တဲ့နေရာတိုင်းမှာ ထားနိုင်လို့ကတော့ ဘာပြောကောင်းမလဲနော်။ အေးချမ်းသာယာ၍ ခေတ်မီဖွံ့ဖြိုးတိုးတက်သော နိုင်ငံတော်ကြီးမှာ မရှိမဖြစ်လိုအပ်တဲ့ စတုတ္ထမဏ္ဍိုင်သမားတွေဆိုတာ ဒါမျိုးမှ အစစ်ပေါ့။ အစိုးရမို့လို့ မျက်စိပိတ် နားပိတ် ရေငုံနှုတ်ပိတ်နေရမယ်။ ပုဂ္ဂလိကမို့လို အသားကုန်ဆော်ပလိုက်မယ်ဆိုတဲ့ အဂတိတရားတွေ ကင်းရမယ်မဟုတ်လား။ ရဲရဲသာ ဆက်လုပ်ပါလေ။ ပြည်သူတရပ်လုံးက ကောင်းချီးပေးကြမှာပေါ့။
            ဘူတန်နိုင်ငံမှာတော့ သူတို့အစိုးရကိုယ်တိုင်က သီးခြားဝန်ကြီးဌာနတစ်ခု ဖွဲ့ပေးထားပါတယ်။ အဂတိလိုက်စားမှု တိုက်ဖျက်ရေးအဖွဲ့တဲ့။ အစိုးရနဲ့ ဌာနဆိုင်ရာဝန်ထမ်းတွေရဲ့ အကျင့်ပျက်ခြစားမှုတွေကို မည်သူမဆို အမှုဖွင့်တိုင်ကြားလို့ရသလို အမှုမှန်ပေါ်တဲ့အထိ စုံစမ်းစစ်ဆေး အရေးယူမှုတွေကိုလည်း ပြုပေးပါတယ်။ အဂတိလိုက်စားမှုတိုက်ဖျက်ရေးနေ့လို့ နေ့တစ်နေ့သတ်ိမှတ်ပြီး တို့ဆီကလိုပဲ ဆိုင်းဘုတ်တွေစာတမ်းတွေကိုင်လို့ စီတန်းလှည့်လည်ကြပါတယ်။ နိုင်ငံတော်နဲ့ပြည်သူ့ဘဏ္ဍာပစ္စည်းတွေကို အလွဲသုံးစားလုပ်တဲ့အမှုမျိုးမပြောနဲ့ ဆေးကုမ္ပဏီတွေ စပွန်ဆာနဲ့ အမေရိက၊ ဥရောပ၊ ဂျပန်ကို သင်တန်းသွားတက်တဲ့အမှုမုိုးအထိ အဂတိလိုက်စားမှုနဲ့ အရေးယူတယ်။ စုံစမ်းစစ်ဆေးရေးတွေလုပ်နေခိုက် သက်ဆိုင်ရာသိုလှောင်ရုံတွေကို ချိတ်ပိတ်ထားလို့ ဆေးဝါးစီးဆင်းမှုတွေ ကမောက်ကမဖြစ်ကုန်တာတောင် ကြုံခဲ့ရပါသေးတယ်။
            တကယ်တော့ အဲသလိုအမှုကိစ္စမျိုးဆိုတာ ဟိုးကမ္ဘာဦးအစ မဟာသမ္မတမင်းတို့ လက်ထက်ကတည်းက ဒီကနေ့အထိ မပျောက်မပျက် ဆက်ခံထိမ်းသိမ်းထားကြတဲ့ အစဉ်အလာမဟုတ်လား။ ဘုရားအလောင်းတော် နုစဉ်အခါတုန်းကတောင် တံခါးမှူးဒတ္ထဘ၀နဲ့ စင်္ကာပူမသွားပဲ ကြိမ်ဒဏ်တ၀က်ခံခဲ့ရသေးတာလေ။ စောင့်ကြည့်ထိန်းသိမ်းပေးမယ့်သူမရှိရင် အကွပ်မဲ့တဲ့ကြမ်း ပရမ်းပတာဖြစ်သွားမျာပေါ့။ ဒီလိုမှန်းသိရင် ရွေးကောက်ပွဲကြီးလုပ်ကတည်းက မဲရုံတစ်ရုံကို သတင်းထောက်တစ်ယောက် ထားပေးလိုက်ပါတော့လားကွယ်။ ဒါမှ မဟုတ်မတရား စွပ်စွဲနေတဲ့သူတွေကို ချက်နဲ့လက်နဲ့ ပြန်ဖြေရှင်းလို့ ရမှာပေါ့။ နောက်ငါးနှစ်အတွက် မီသေးတယ်လေ။ ဗော်လံတီယာလုပ်ကြပါလား။
           မြန်မာပြည်မှာ သတင်းစာရယ်လို့ ပထမဦးဆုံးစပေါ်ခဲ့တဲ့ ရတနာပုံသတင်းစာခေတ်ကတည်းက မင်းတုန်းမင်းတရားကြိးကိုယ်တော်တိုင် ` ငါမကောင်းရင်ငါ့ရေး။ ငါ့မိဖုရား မကောင်းရင် မိဖုရားရေး၊ ငါ့ဝန်ကြီးတွေမကောင်းရင် မကောင်းတဲ့သူတိုရေး´ လို့ အခွင့်ထူးကြီးပေးသနားခဲ့ပါသတဲ့။ (သူ့လိုကတော့ တို့လည်း ပြောတတ်ပါတယ် လို့ ဆိုကြရော့မယ်) အင်္ဂလိပ်ကိုလိုနီ လက်အောက်မှာတောင် `ငရဲခွေးကြီးလွတ်နေသည်´ တို့၊ ´ဂက်ဒေါက် ကရက်ဒေါက်´ တို့လို သတ္တိပြောင်တဲ့ဆောင်းပါးတွေ ပေါ်လာခဲ့တာပဲ။ သတင်းသမားတို့ရဲ့ ဘိုးအေကြီး လူထုဦးလှဆိုရင် စာနယ်ဇင်းလွတ်လပ်မှုနဲ့ ဂုဏ်သိက္ခာအတွက် အကြိမ်ကြိမ် တရားစခန်းဝင်ခဲ့ရရှာပါတယ်။ ဒါမျိုးဆိုတာ ဘိုးဘိုးအောင်ရေးတဲ့ ၀လုံးတွေလို တစ်လုံးဖျက်ရင် နှစ်လုံးပေါ်လာသင့်တာ မဟုတ်ပါလား။ ဖျက်တဲ့သူတွေလိုက်ဖျက်လို့ ဆက်မရေးတော့ဘူးဆိုရင် ၀လုံးတွေ ပျောက်ကုန်မှာပေါ့။ ဒါကြောင့်မို့ `တို့ဘိုးဘွားအမွေစစ်မို့ ချစ်မြတ်နိုးပေ´ ဆိုတဲ့အထဲမှာပါတဲ့ သတင်းသမားတို့ရဲ့ သတ္တိ၊ ၀ီရိယနဲ့ အမှန်တရားဘက်က ရပ်တည်မှုတွေကို အားကျအတုယူကြဖို့ အချိန်တန်ပြီလို့ ဆိုချင်ပါတယ်။
          ခေတ်စံနစ် အချိန်အခါကလည်း အရင်ကလို မဟုတ်တော့ပါဘူး။ စာနယ်ဇင်းလွတ်လပ်ခွင့်တွေကို စည်းကမ်းစံနစ် ဘောင်အတွင်းကနေ ပေးနေပြီလို့ အတိအလင်း ကြေငြာထားတယ် မဟုတ်လား။ ဒီလိုအခါမျိုးမှာ နမူနာစံပြအဖြစ် တို့ဆရာဝန်တွေဆီကနေစလို့ မျက်လုံးဒေါက်ထောက်ကြည့်နေသူတွေရှေ့မှာ မှန်အောင်နေပြလိုက်မယ်ဆို ခေါင်းမော့ရင်ကော့ပြီး မှတ်ကျောက်တင်ခံရတာ ဘယ်လောက်များ ဂုဏ်ယူစရာကောင်းလိုက်သလဲနော်။ ဆီလိုအပေါက်ရှာပြီး အပြစ်ပြောပေးမယ့်သူရှိမှ ကိုယ်ဘယ်လောက်အပြစ်ကင်းသလဲဆိုတာ သိသာနိုင်မှာဗျ။ ၀ါသနာပါရင် အိမ်သာထဲအထိ စီစီတီဗီကင်မရာတွေ တပ်ထားစမ်းပါလေ။ အိုက်တင်ကလေးနဲ့ ယိုပြလိုက်မှာပေါ့။ မဟုတ်ဘူးလား။ ဒေးဗစ်ဘက်ခမ်း ရှူရှူပေါက်တာ ယူကျုပေါ်ရောက်နေတဲ့ခေတ်မှာ တို့ဆရာဝန်တွေလည်း ကမ္ဘာကျော်ရချေသေးရဲ့။ ဟေးဟေး။
          မောင်တို့ချယ်ရီမြေထဲက ခင်သန်းနုနောက်ကို သတင်းသမားတွေလိုက်သလို ဆရာဝန်တွေနောက်ကို ဂျာနယ်လစ်တွေ တကောက်ကောက်လိုက်ယူရတယ်ဆိုတာကိုက ပေါ့သေးသေးမှတ်လို့။ ဟိုးအရင်ခေတ်တုန်းက ဂျာနယ်ကျော်ဦးချစ်မောင်တို့ ဂျာနယ်ကျော်မမလေးတို့လို ဒီခေတ်မှာလည်း ဂျာနယ်ကျော်ဆရာဝန်တွေပေါလာဦးတော့မှာပေါ့။ ဟန်ကျလိုက်လေ။ ကိုယ်တိုင်လည်း စာတိုပေစတွေ မတောက်တခေါက်ရေးနေတဲ့အချိန်ဆိုတော့ အခမဲ့ကြော်ငြာပေးမယ့်သူရှိတုန်း ပရိုမိုးရျင်းဆင်းပလိုက်မယ်လေ။ တစ်ယောက်တလှည့် အင်တာဗျူးကြရင် မကောင်းဘူးလား။ ` ဟိုပေါ့နော်။ ဘယ်လိုပြောမလဲပေါ့နော်..။ အဲဒါက အဲလို ရှိတယ်လေ။ ဟုတ်..။ ခင်ဗျားပြောတဲ့အတိုင်းပါပဲ..။´ အဲလို အဲလို ဒိုင်ယာလော့ကလေးတွေကို မှန်ထဲကြည့်ပြီး ပဲလေးနဲ့ ပြောတတ်အောင် ကျင့်ထားပါ့မယ်။ `အရင်လို မဟုတ်တော့ဘူးဗျ။ အများကြီးပြောင်းလဲသွားပြိ။ ရှေ့လျှောက်ကောင်းမယ့် အလားအလာတွေ မြင်နေရပြီ။ အဲဒီအတွက် ကျွန်တော်လည်း ကိုယစွမ်းဥာဏ်စွမ်းရှိသမျှ ဆက်ကြိုးစားသွားမှာပါ။ ပါတီစွဲ တသီးပုဂ္ဂလစွဲတွေ မရှိပါဘူး။ မြန်မာလူမျိုးတွေ ကောင်းစားဖို့က အဓိကပါ..´ ဆိုတာမျိုးတွေလည်း ဟုတ်ဟုတ် မဟုတ်ဟုတ် ထည့်ပြောမှာပဲ။ `ဆိုင်လို့လား´ လို့ ချောင်ပိတ်မေးလာရင် ´နိူင်ငံတကာမှာ ဂလိုပဲလေ။´ လို့ ကိုင်ပေါက်ပလိုက်မယ်။ အားကျအတုယူမိတဲ့ စံပြပုဂ္ဂိုလ်တစ်ယောက်အကြောင်း မေးလာရင်တော့ ဂျိုဆေရီဇော်တို့၊ ချီဂွေဗားရားတို့ ဒေါက်တာဇီဗားဂိုးတို့ ကြားဖူးနားဝ ဆရာဝန်နံမည်တွေ ရွတ်ပြလိုက်မယ်လို့ စဉ်းစားထားပြီးသား။ ပြီးရင် `တစ်နိုင်ငံလုံးကို ဆေးကုချင်လို့ပါ´ လို့ ဖိန့်လိုက်မှာပေါ့။
           `အာရောဂျံ ပရမံ လာဘံ ကျန်းမာခြင်းသည် လာဘ်ကြီးတစ်ပါး´ ဆိုတာကို ဒီကနေ့ခေတ် တက်လာတဲ့ အစိုးရတိုင်းက သတိပြုမိနေကြပါပြီ။ အမေရိကားမှာ အိုဘားမားကြိးတက်စတုန်းကလည်း အလုံးစုံလွှမ်းခြုံသော ကျန်းမာရေးအာမခံစံနစ်ဆိုတာကြီးကို ဥပဒေနဲ့ အတည်ပြုခဲ့တာပဲ။ အင်္ဂလန်မှာလည်း ရွေးကောက်ပွဲပြိးပြိးချင်း အာဏာရပါတီက အမျိုးသားကျန်းမာရေးစံနစ်ကို ပြုပြင်ပြောင်းလဲမှုတွေ လုပ်ခဲ့တာပဲ။ ကျုပ်တို့ဆီမှာလည်း အစိုးရသစ်တက်လာလာချင်း ဆရာဝန်တွေကို စကိုင်လိုက်တယ်ဆိုတာ ဖော်မြူလာမအောက်သေးပါဘူး။ ဒီခွင်အတိုင်းဆက်ထိုးရင် ဒဲ့ဝင်ဖို့ရှိတယ်။ မယုံရင် စောင့်ကြည့်။ ထိုင်းမှာတက်လာတဲ့ သဇင်နဲ့ခပ်ဆင်ဆင် မယဉ်လဲ့ကလေးလည်း သိပ်မကြာခင် ဆရာဝန်တွေကို မျက်စောင်းထိုးလာလိမ့်မယ်။ မဟီဒေါကဆင်းတဲ့ သယ်ရင်းကလေးတွေ ရူပါလေးဘာလေး တင်ထားကြဦးနော။
            ဒီလို တိုက်ရေးခိုက်ရေးတွေ ဟန်ရေးပြင်နေခိုက် တဘက်ကလည်း ကိုယ့်ဘက်က ခံစစ်လုံအောင် သံခင်းတမန်ခင်းကလေး မဟာမိတ်ကလေးတွေ ပြုထားကြဖို့လည်း လိုဦးမယ်ထင်ပါတယ်။ ၀တ်လုံတော်ရမင်းတို့၊ တရားသူကြိးမင်းတို့ ဥပဒေရေးရာအကြံပေးပညာရှင်တို့ဆိုတာတွေနဲ့တွေ့ရင် ပြုံးပြုံးကလေးနဲ့ ခေါင်းကလေးညွှတ်ပြီး `မာရဲ့နော´ လို့ သိသိမသိသိ မိတ်ဆက်လို့ အကျွမ်းတ၀င်ဖြစ်အောင်နေသင့်တာပေါ့။ အလင်းတန်းက ဦးမြတ်ခိုင်တို့ ရွှေအမြုတေက ဦးဝင်းငြိမ်းတို့ကို ဖေ့စ်ဘုတ်ထဲမှာ မတွေ့တွေ့အောင်ရှာပြီး မိတ်ဆွေဖြစ်ခွင့်တောင်းထားဦးမှပါ။ အရေးအကြောင်းဆို ကိုယ့်မိတ်ဆွေစာရင်းထဲ သူတို့နံနည်တွေတွေ့ရင် ဘာရယ်လို့ ဟုတ်ဘူးလေ။ လူရှိန်တာပေါ့။ တော်ရုံတန်ရုံ ဂျာနယ်လစ်လေးလောက်ဆိုရင်လည်း သူတို့နံမည်တွေရွတ်ပြီး ´ဘော်ဒါတွေပါ´ လို့ ဖိန့်လိုက်ရင် ကြည်စေအေးစေ ဖြစ်သွားမှာပေါ့။ (သူတို့နဲ့ မတည့်တဲ့လူတော့ သွားမလုပ်မိစေနဲ့နော်) သုတစွယ်စုံတို့ အာရောဂျံတို့ကိုလည်း ဆောင်းပါးအတိုအထွာတွေ ပို့ထားဥိးမှပါ။ မရှိတာထက် မသိတာခက် တဲ့။ ကိုယ့်မှာပိုက်ဆံ ဘယ်လောက်ရှိရှိ လူကြိးထဲ အသိမရှိရင် သေတာတောင် အလောင်းမြေကျဖို့ခက်တယ်။ ဒါကြောင့်မို့ ကိုယ့်ကိုလူတိုင်းက မသိသော်ငြား ကိုယ်ကလူတိုင်းကို သိနေဖို့လိုတယ်ဗျ။ သူတို့က ကိုယ့်ကိုမသိတာ အရေးမကြီးဘူး။ အဖြီးအဖြန်းကောင်းရင် ဖော်လိုနဲ့ ပါလာမှာ။ ကိုယ်ကသာ ဘယ်သူက ဘယ်မှာ အခရာဆိုတာသိရင် ချက်ကောင်းထိအောင် ပစ်လို့ရပြီမှတ်။ မည်းမည်းမြင်ရာလျှောက်ပစ်နေရင် အလကား ကျည်ကုန်တယ်။ လူကြားတယ်။ ထိုင်းမှာလို စနိုက်ပါနဲ့ ဆိုင်လင်ဇာနဲ့ ပစ်စမ်းပါ။ `လာလေ့ .. ဖွတ်´ ပေါ့။
            ဒီ့ထက်ပိုပြီး အသေးစိတ်သိချင်တဲ့ ဆရာဝန်ကလေးတွေ အတွက်တော့ ဆရာမကြိး တင်မိုးလွင်လို "Talent and Model for Doctors" ဆိုပြီး သင်တန်းဖွင့်စားရင် ကောင်းမလားလို့။ ဘယ်လိုသဘောရသလဲ။ လူနာရှေ့မှာ လမ်းလျှောက်ပြနည်း၊ သတင်းသမားများနှင့် အင်တာဗျူးဖြေနည်း၊ တရားခွင်တွင် ထွက်ဆိုချက်ပေးနည်း၊ ဖက်ရှင်ကျကျ ဆရာဝန်ဘ၀၊ စတာတွေကို သင်ပေးမယ်လေ။ Advanced level ကျရင်တော့ ခနိုးခနဲ့ ရွဲ့တဲ့တဲ့ စကားပြောနည်း၊ မထိတထိ ရိတိတိ ကလိနည်းတို့ ပုဆိုးကိုချိတ်ဝတ်၍ ဂျပိုးကိုလိပ်ဖြစ်အောင်ပြောနည်းတို့ကို ကျွမ်းကျင်အဆင့်ထိရောက်အောင် လေ့ကျင့်ပေးမယ်ဗျား။ သဘောကျရင်ဖြင့် အောက်က ကွန်မန့်ထဲမှာဝင်ပြီး တိုကင်ယူသွားနော်။ လူဦးရေ ကန့်သတ်ထားတယ်။ ပထမဆုံး အယောက်နှစ်ဆယ်အတွက် ရေကြည်အိုင်ကို အင်တာဗျူးနှစ်ပါတ် စားရိတ်ငြိမ်း ပို့ပေးမှာ။ ဒိ့ထက်ပိုပြီး တက်ကြွတဲ့သူတွေအတွက်ဆို ဒီဗီအင်းစိန်ဗီဇာတွေလျှောက်ပေးလိုက်ဦးမှာ။ ဂျာနဂျို ဆရာစိုးနဲ့ တွေ့ရင် ဘာမဆို နှစ်ခါရှိုးယူရတဲ့အထိ ကိုယ့်မျက်လုံးတောင် ကိုယ်မယုံနိုင်အောင် ပြောင်းလဲသွားစေရမယ်။ အခုတောင် တခန်းနှစ်ခန်းပဲ ပြရသေးတယ်။ ဖလန်းဖလန်းထသွားပြီ မဟုတ်လား။ ကန်ချက်တွေက လန်ထွက်နေတာ ခြေစစ်ပွဲ ၀င်ခိုင်းမနေပါနဲ့တော့။ လူချင်းသာ လာတွေ့လိုက်။ သွက်သွက်လည်မသွားတော့ ပြောချင်တိုင်းပြော။ အဟတ် .. အဟတ်။

( ဂျာနဂျို ဆိုသည်မှာ ကုလားလူမျိုးများစားသော ကုလားပဲထောင်းမုန့် ကျာနာဂျိုဖြစ်ပြီး ဂျာနဂျိုအမကြီးဆိုသည်မှာ ဆရာကြီးသော်တာဆွေက ဆရာမကြီး ဂျာနယ်ကျော်မမလေးအား သုံးသော နာမ်စားဖြစ်ပါသည်။ ရှေးက စာကောင်းပေမွန်များကို သတိရစွာဖြင့် ပြန်လည်ဖော်ထုတ်မိပါကြောင်း)
http://www.facebook.com/note.php?note_id=10150384750383902

 (ရရှိလာသောမေးလ်ကို ထပ်ဆင့်ဖေါ်ပြပါသည်)