ပြည်ပရောက် ကျောင်းသားတစ်ဦး၏ ကိုယ်တွေ့ဖြစ်ရပ်ဆိုး
မနိုင်းရေ...
ကျနော်က ပြည်ပမှာ ပညာသင်နေတဲ့ ကျောင်းသားတစ်ယောက်ပါ။ ကျနော်ရဲ့မိုက်မဲခဲ့မှု (ကြုံတွေ့ခဲ့ရတဲ့ ဖြစ်ရပ်ဆိုး)ကို တခြားပြည်ပရောက် မြန်မာကျောင်းသားတွေကို မကြုံတွေ့စေလိုတဲ့အတွက် မနိုင်းကတဆင့် မျှဝေပေးစေချင်ပါတယ်။ ဘာကြောင့်လဲဆိုတော့ မနိုင်းရဲ့စာဖတ်ပရိတ်သတ်တွေမှာ ပြည်ပရောက် ကျောင်းသားကျောင်းသူတွေ အများအပြားရှိလို့ပါပဲ။ ကျနော့်အမည်ရင်းနဲ့ အဖြစ်အပျက်နေရာကို မဖော်ပြထားတာ နားလည်ပေးစေချင်ပါတယ်။ ဤစာကိုကျေးဇူးပြုပြီး ပြည်ပရောက် ကျောင်းသားတစ်ဦးရဲ့ ဖွင့်ဟချက်အနေနဲ့ မျှဝေပေးဖို့ ကျနော်အကူအညီတောင်းလိုက်ပါတယ်။ ကျေးဇူးတင်ပါတယ်။
--------
ဂျူလိုင်လလယ်မှ စက်တင်ဘာလကုန်ထိကာလသည် အလွန်သာယာသော အခါသာမယဖြစ်သည်။ တစ်နှစ်ပတ်လုံးအတွက် အသာယာဆုံးရာသီဥတုရှိပြီး နွေရာသီကျောင်းပိတ်ရက်လည်း ဖြစ်သည်။ ထိုနွေကာလ တစ်နေ့သောအခါဝယ် ကျွန်တော်သည် မြို့ပြကြီးတစ်ခုသို့ ခြေဦးလှည့်မိသည်။ ကျောင်းပိတ်ရက် အိမ်တွင်းမအောင်းချင်သဖြင့် မရောက်ဘူးသေးသော ကမ္ဘာလှည့်ခရီးသည်များ စိတ်ဝင်စားသည့်နေရာများသို့ မြေပုံအတိုင်းလျှောက်သွားကြည့်၏။
နေသာသောနေ့တစ်နေ့၏ မွန်းလွဲချိန်ဖြစ်ပြီး အပူချိန်မျှတသည်။ ခြေဦးတည့်ရာ လျှောက်ကြည့်နေရင်းနှင့် ထိုမြို့၏နာမည်ကြီး မီးနီရပ်ကွက် (တနည်းဆိုသော် ပြည့်တန်ဆာတန်း) သို့ရောက်သွား၏။ တစ်နေရာအရောက်တွင် ဆိုင်တစ်ခု၏အပြင်ဘက်မှာ ထိုင်နေသော အသက် (၅ဝ)ကျော် (၆ဝ)ခန့်ရှိ လူတစ်ယောက်က ကျွန်တော်ကိုမေးသည်။
"မင်းဒီကိုအလည်လာတာလား!"
"ကျွန်တော်ကျောင်းသားပါ"
"ဒီနေရာက နေ့ကလပ်။ နေ့ခင်းဘက် ကျောင်းသားလူငယ်တွေ ဒီမှာအပျင်းပြေ ကိုကာကိုလာ ဒါမှမဟုတ် ဘီယာသောက်ရင်း အမျိုးသမီးတွေ ကပြဖျော်ဖြေတာ ကြည့်လို့ရတယ်။ (၇)ဒေါ်လာပဲ ကျမယ်။ မင်းစိတ်ဝင်စားလား?"
ကျွန်တော် ဘာမှပြန်မပြောခင်မှာဘဲ ….
"လာ… ငါနဲ့လိုက်ကြည့်ပါ"
ကျွန်တော်လည်း တစ်ခါမှရောက်ဘူးသေးသောနေရာ… ပြီးတော့ (၇)ဒေါ်လာသာကျမည် ဆိုသောကြောင့် လိုက်သွားကြည့်မိသည်။ အထဲသို့ရောက်သောအခါ နေရာတစ်ခုပေးပြီး ဘာသောက်မလဲဟုမေးသည်။ ကျွန်တော်လည်း ကိုကာကိုလာတစ်ပုလင်းမှာပြီး စင်ပေါ်တွင်ကပြနေသော အမျိုးသမီးကိုကြည့်နေမိသည်။ လျှပ်ပေါ်လော်လီဝတ်စုံဖြင့် ကပြဖျော်ဖြေနေခြင်းဖြစ်သည်။
တခဏအကြာတွင် ဤဆိုင်၌အလုပ်လုပ်သော အမျိုးသမီးတစ်ဦးက မှာထားသောကိုကာကိုလာကို လာပေးရင်း ကျွန်တော့်အနားတွင်ဝင်ထိုင်ကာ စကားစမြည်ပြောလေသည်။ မိတ်ဆက်၍ အလာပ သလာပပြောရင်းမှာပင် သူက...
"ကျွန်မ ရှင့်ကိုကပြပါ့မယ်။ ကျွန်မကို တစ်ခုခုဝယ်တိုက်ပါလား"
"ရပါတယ်"
ထိုအခါ သူသည် ယမကာဖျော်ရည်တစ်ခုကို မှာသောက်သည်။ ခဏအကြာတွင်စင်ပေါ်မှ အမျိုးသမီးကဆင်းလာပြီး..
"ကျွန်မလည်း ရှင့်ကိုကပြပါ့မယ်။ ကျွန်မကိုလည်း တစ်ခုခုဝယ်တိုက်ပါ"
ထို့နောက် စကားစမြည်ပြောရင်းနှင့်ပင် ကျွန်တော့်အနားတွင် ကနေကြသည်။ တခဏအကြာတွင်မှ ပထမအမျိုးသမီးက
"ရှင်ငွေအရင်ရှင်းလိုက်ပါ။ ပြီးရင် ကျွန်မဆက်ကပြပါ့မယ်"
ထို့ကြောင့် ကောင်တာသို့သွားပြီး ဘောက်ချာတောင်းသောအခါ…
မြတ်စွာဘုရား…
ဒေါ်လာ(၉ဝဝ)ကျပါသတဲ့….
ဖြစ်ပုံမှာ ကိုကာကိုလာနှင့် ဘီယာမှတပါး ကျန်သောသောက်စရာတို့မှာ အနည်းဆုံးဒေါ်လာ(၃ဝဝ)ရှိသည်။ မည်သို့မှမတတ်နိုင်။ ကျောင်းသားတစ်ဦးအတွက် ထိုငွေပမာဏမှာ ကြောက်မက်ဖွယ်ရာပင်။ ကျွန်တော်၏အကြီးမာဆုံးသောအမှားမှာ ကိုကာကိုလာနှင့်ဘီယာသည် (၇)ဒေါ်လာသာကျသဖြင့် ကျန်အဖျော်ယမကာများသည် (၁ဝ)ဒေါ်လာ (၁၅)ဒေါ်လာထက်မပိုနိုင်ဟု လက်လွတ်စပယ် ယူဆလိုက်ခြင်းပင် ဖြစ်သည်။ ထိုအခါ ပထမအမျိုးသမီးက
"ရှင်ကကျောင်းသားဖြစ်လို့ ငွေအရင်ရှင်းခိုင်းလိုက်တာ။ ကျွန်မတို့ထပ်မှာရင် ဒေါ်လာ (၃ဝဝဝ)လောက်အထိတော့ အသာလေးကျသွားနိုင်တယ်။ ရှင့်ရဲ့အမှားကတော့ မမေးတာပဲ။ ဘယ်တော့မဆို တစ်ခုခုဆိုရင် ဈေးကိုအရင်မေးပါ။ အခုတော့ရှင်းလိုက်ပါ။ ကျွန်မလည်းမတတ်နိုင်ဘူး"
ဘာလုပ်ရမှန်းမသိဘဲ ထွက်ပြေးဖို့ စဉ်းစားကြည့်တော့…
"ငါက လက်ရှိပညာရှာဆဲ ကျောင်းသားတစ်ယောက်။ ထွက်ပြေးလို့မိသွားပြီး ရဲလက်ကိုအပ်လိုက်လျှင် ပညာရေးသာမက အနာဂတ်ပါထိခိုက်လိမ့်မယ်။ ဘယ်တတ်နိုင်မလဲ။ တောင်းပန်ကြည့်တာပေါ့"
"ကျောင်းသားတစ်ယောက်အတွက် ဒေါ်လာ(၉ဝဝ)က အင်မတန်မှခက်ခဲပါတယ်။ ကျေးဇူးပြုပြီး ကျွန်တော့်ကို တတ်နိုင်သလောက် လျော့ပေးပါ။ ကျွန်တော်အနူးအညွတ် တောင်းပန်ပါတယ်"
အချိန်အတော်ကြာ တောင်းပန်ပြောဆိုပြီး နောက်ဆုံးတွင်ဒေါ်လာ (၅၅၀)ရှင်းခဲ့လိုက်ရသည်။
အိမ်ပြန်ရောက်၍ အင်တာနက်တွင် နှိုက်နှိုက်ချွတ်ချွတ် မွေနှောက်ရှာဖွေကြည့်သောအခါမှ ထိုကဲ့သို့ဖြစ်ရပ်များသည် ဥရောပတွင်အဖြစ်များပြီး ကမ္ဘာတဝှမ်းတွင် ဖြစ်ပေါ်လေ့ရှိသော လိမ်လည်မှုဖြစ်သည်။ သို့သော် ထိုလိမ်လည်မှုသည် တရားဝင်သည်။ ထိုဆိုင်၏ဈေးနှုန်းကိုမကြည့်ဘဲ ဝယ်ရန်သဘောတူမိသည့်အတွက် ရဲအရာရှိများလည်း မဖြေရှင်းပေးနိုင်ပေ။ အင်တာနက်ပေါ်တွင် ရှာကြည့်သောအခါတွင်မှ ဒေါ်လာထောင်သောင်းချီပြီး ရှင်းခဲ့ရသူများရှိသည်။
ထိုအကြောင်းခြင်းရာများကို စဉ်းစားရင်း ...
"အကယ်၍ ငါသာဒေါ်လာထောင်သောင်းနှင့်ချီပြီး ရှင်းရမည်ဆိုလျှင်…" ဆိုသည့်အတွေးက ယခုထိခြောက်လှန့်နေဆဲဖြစ်သည်။
ထိုကြောင့် ပြည်ပတွင်ပညာသင်ကြားနေသူ ကျောင်းသားလူငယ်များကို ဤအဖြစ်အပျက်နှင့် မကြုံတွေ့စေလိုပေ။
"လူလိမ္မာတို့မည်သည် တပါးသူအမှားမှ သင်ခန်းစာယူသည်။ လူမိုက်တို့မည်သည် ကိုယ်တိုင်မှားမှ သင်ခန်းစာရသည်။ ပို၍မိုက်မဲသောသူတို့ကား ကိုယ်တိုင်မှားပါလျက်နှင့် သင်ခန်းစာ မယူတတ်ကြကုန်"
ထို့ကြောင့် ကျွန်တော်လူမိုက်သည် ပို၍မိုက်မဲသောသူ မဖြစ်အောင်ကြိုးစားရင်း လူလိမ္မာ ကျောင်းသားလူငယ်တို့ ဆင်ခြင်တွေးတော သင်ခန်းစာယူနိုင်ရန် မျှဝေလိုက်ရပါသည်။
ပြည်ပရောက် ကျောင်းသားတစ်ဦး
No comments:
Post a Comment