ရခိုင် တိုင်း ရင်း သားတို့၏ ရိုးရာပုံပြင် မြောက်ဦးဘုရင်နှင့် ငစွေအက
May 17, 2014
**************************************************
သူသူထက်လွင် ၊ ရန်ကုန်တိုင်းမ် ဂျာနယ် အတွဲ(၁၀) အမှတ် (၁၈)
**************************************************
ရခိုင်တိုင်းရင်းသားများ၏ ရိုးရာယဉ်ကျေးမှုအကများ တွင် နောက်ခံသမိုင်းပုံပြင်များရှိနေပါသည်။
မြောက်ဦးခေတ်တွင် စတင်ပေါ်ပေါက်လာခဲ့သော ရခိုင်ငစွေအက၏နောက်ကွယ်တွင် ဖြစ်ရပ်မှန်သမိုင်းတစ်ခု ရှိခဲ့သည်။ ယနေ့အချိန်အခါတွင် ရခိုင်ငစွေအကမှာ တိမ်မြုပ် ပျောက်ကွယ်ခါနီးဖြစ်သည့်အတွက် ''မြောက်ဦးဘုရင်နှင့် ငစွေအက'' သမိုင်းပုံပြင်ကို လေ့လာဖော်ပြပေးမှာဖြစ်ပါ သည်။
''ငစွေအကက တော်တော်လေးရှားသွားပြီ။ မှတ်မှတ် ရရ ကျွန်မတို့ငယ်ငယ်တုန်းက ရွာမှာလာကပြတာတွေကို မြင်ဖူးတယ်။ အခု ကနိုင်တဲ့သူ တော်တော်လေးရှားနေပြီ'' ဟု အသက် ၂ဝကျော်အရွယ် ရခိုင်တိုင်းရင်းသူတစ်ဦးက ပြောပြသည်။
ရှေးရခိုင်ဘုရင် သီရိသုဓမ္မရာဇာသည် မြောက်ဦးထီး နန်းကို စိုးစံခဲ့ပြီး မြောက်ဦးမင်းဆက် ၂ဝမြောက် ဘုရင် တစ်ပါးဖြစ်ကာ ငယ်ရွယ်သောမိဖုရားတစ်ဦးကို ပိုင်ဆိုင် ထားသူတစ်ဦးလည်းဖြစ်သည်။ သူ၏မိဖုရား နတ်ရှင်မယ် မှာ ငယ်ရွယ်လှပပြီး မာန်မာနကြီးသူဖြစ်တဲ့အတွက် အို မင်းသော ဘုရင်မင်းမြတ်၏ အပြော၊ အမိန့်များမှာ သူ့ကို နှိမ်သည်ဟုထင်မှတ်ပြီး မခံမရပ်နိုင်ဖြစ်နေပါသည်။
အဲဒီအချိန်တွင် လောင်းကြက်မြို့ကို အပိုင်စားရသော လောင်းကြက်စား ငကုသလမှာ မင်းအဖြစ်ကိုလိုချင်သော ကြောင့် မိဖုရားနှင့်ပူးပေါင်း၍ ဘုရင်ကိုအနိုင်ယူရန်စီစဉ် လေသည်။
လောကီအတတ်ပညာများတွင် ''နံတူသတ်ရအနိုင် ရ''ဆိုသည့်အတိုင်း အင်္ဂါသားဖြစ်သော ဘုရင်သီရိသုဓမ္မာ ရာဇာကို သတ်လိုသောကြောင့် လောင်းကြက်စား ငကုသ မှာ နန်းတော်ထဲတွင် အင်္ဂါနံ ငါးစွေ(ငစွေ)အား ဖမ်းယူ သတ်ဖြတ်သည့်ဇာတ်လမ်းကိုတီထွင်၍ နန်းတွင်းတွင် တင် ဆက်ကပြလေသည်။ ငစွေ(ငါး)ကို နှိုက်ပုံ၊ ငစွေ အဖမ်းရ ခက်ပုံ၊ ငစွေက အမြီးတရမ်းရမ်း ခေါင်းတရမ်းရမ်းဖြစ်နေ ပုံ၊ ငစွေသားကို အလွန်မတန်စားပြီး ဝမ်းပျက်ရပုံတွေကို ဖွဲ့နွဲ့ပြီး ဘုရင့်အား ဖျော်ဖြေတင်ဆက်ခဲ့သည်။
အဆိုပါ လောင်းကြက်စား ငကုသလမှ စတင်တီထွင် ခဲ့သော ငစွေကခြင်းဓလေ့မှာ ယနေ့တိုင် ရခိုင်အမျိုးသား တို့၏ ယဉ်ကျေးမှုတစ်ရပ်အဖြစ် ရှင်သန်လာခြင်းဖြစ်သည်။
''လောင်းကြက်စားအမတ် ငကုသလက ဘုရင်ကို နာမ်နှိမ်တဲ့အနေနဲ့ အဲဒီအကကို စထွင်ခဲ့တယ်။ နောက် ပိုင်းမှာ တိုင်းပြည်မှာဖြစ်ပျက်နေတာကို အုပ်ချုပ်သူတွေ သိအောင် နန်းတွင်းမှာဖြစ်ပျက်နေတာကို ဘုရင်သိအောင် တင်ဆက်ကပြလာပါတယ်။ ဗမာလိုဆိုရင် ကွက်စိပ်ပေါ့။ ကွက်စိပ်နဲ့ မတူတာက ကွက်စိပ်က အသံနဲ့ပဲသရုပ်ဆောင် ရတာ။ ငစွေအကကတော့ လူတစ်ယောက်တည်းကပဲ ဘုရင် ဆို ဘုရင်၊ မိဖုရားဆို မိဖုရား လူကိုယ်တိုင်ပါ သရုပ်ဆောင် ပြရပါတယ်''ဟု ရခိုင်စာပေနှင့်ယဉ်ကျေးမှုအဖွဲ့မှ ဒေါ်အေး အေးဇံက ပြောသည်။
လောင်း ကြက်စားငကုသလကို မိဖုရားက ချစ်ခင်စုံမက်သောကြောင့် ငကုသလနှင့် မိဖုရားနတ်ရှင်မယ်တို့ပူးပေါင်းပြီး ဘုရင်အား လုပ်ကြံ သတ်ဖြတ်လိုက်လေသည်။ သီရိသုဓမ္မာရာဇာဘုရင် နတ်ရွာစံပြီးနောက် သား တော် မင်းစနေမြောက်ဦးနန်းကို စိုးစံတော်မူသည်။ ဘုရင့်သားတော် မင်းစနေကိုလည်း နန်းသက် ၂ဝ ရက်မြောက်တွင် အဆိပ်ခတ်ကာသတ်ဖြတ်လိုက်ပြီး လောင်း ကြက်စား ငကုသလမှာ ဘုရင်နရပတိကြီးအမည်နဲ့ မြောက် ဦးထီးနန်းကို ခုနစ်နှစ်တိုင်တိုင် စိုးစံခဲ့သည်။
ဘုရင်နှင့် ဘုရင့်သားတော်ကို သတ်ဖြတ်ပြီးနောက်ပိုင်းမှာ မိဖုရားနတ်ရှင်မယ်ကိုပင် မိဖုရားမြှောက်ခဲ့သည်။ ငကုသလသည် နောင်အခါတွင် မိမိအား ဘုရင်ကဲ့သို့ပင် မိဖုရားက လုပ်ကြံမည်စိုး ရိမ်ပြီး မိဖုရားအရာမှချကာ နန်းတော်မှ နှင်ထုတ်လိုက် လေသည်။ ''မိဖုရားကတော့ သူ့သားကိုသတ်မှာမဟုတ်လောက် ဘူး။ မင်းစနေကိုကျွေးမယ့်အစာထဲမှာ အဆိပ်ပါမယ်မှန်း မသိလို့ ဖြစ်သွားတာဖြစ်မယ်။ အဲဒီမိဖုရားက အခုထိ မကျွတ်သေးဘူးလို့ ပြောပါတယ်''ဟု ရခိုင်တိုင်းရင်းသူ တစ်ဦးကပြောသည်။
ဘုရင်အား လုပ်ကြံသတ်ဖြတ်လိုက်သောမိဖုရား သည် သူတစ်ပါးအားမကောင်းကြံသောစိတ်ကြောင့် သား တော်၏အသက် သေဆုံးရုံမျှမက ကိုယ်တိုင်လည်း မိဖုရား အရာမှချကာ နန်းတော်မှနှင်ထုတ်ခံသည်အထိ ပြစ်ဒဏ် ခံရခြင်းပင်ဖြစ်သည်။
လောင်းကြက်စားငကုသလ နောင်မြောက်ဦးဘုရင် နရပတိမင်းတီထွင်ခဲ့သော ငစွေအကမှာ တစ် ယောက်တည်း ကပြရသောအကဖြစ်သည်။ ကွက်စိပ်ကဲ့ သို့ အသံပေါ်မူတည်သည့် ဘုရင်ဖြစ်သည့်အခါ ဘုရင် အဝတ်၊ မိဖုရားဖြစ်သည့်အခါ မိဖုရားအဝတ်၊ သရဖူကို စက္ကူနဲ့ ပြုလုပ်တင်ဆက်လေ့ရှိပြီး ဓားကိုမူ အနီးနေအိမ်မှ ငှားယူလေ့ရှိသည်။
ဘုရင်လုပ်သည့်အခါ ရာဇပလ္လင်မှာ ဆန်ဖွပ်သည့် ဆုံထက်တက်ထိုင်ပြီး အမတ်ကြီးအဖြစ် သရုပ်ဆောင် သည့်အခါ ဆုံပေါ်မှဆင်း၍မြေကြီးပေါ်တွင် ဒူးထောက် ကာ လက်အုပ်ချီလျက် သရုပ်ဆောင်ရသည်။
ငစွေအကကို ကျေးလက်တောရွာများတွင် လယ် သမားများ တလင်းသိမ်းချိန်၊ ရွာသားများ အားလပ်ချိန် ကိုရွေးချယ်၍ ကပြကြသည်။
ယင်းအကကိုကပြသောသူတွင် လွယ်အိတ်တစ်လုံး နှင့် ထီးတစ်ချောင်းသာပါပြီး ကျေးရွာလူကြီးအိမ်တွင် တည်းခိုကာ ရွာသားများကိုစည်းရုံးလျက် ကပြရသည်။ပွဲကြည့်သူများက စေတနာရှိသလောက် အခကြေးငွေ အဖြစ် ဆန်တစ်ဘူးကျစီလှူဒါန်းကြကြောင်း သိရသည်။
''ကျွန်တော်ကတော့ ငစွေအကကို အသက်ရှစ်နှစ် ကိုးနှစ်လောက်က နောက်ဆုံးကြည့်ခဲ့ဖူးတယ်။ ငစွေက တဲ့သူက တော်တော်လေးတော်တယ်။ ဘုရင်လဲသူပဲ။ မိ ဖုရားလဲ သူပဲ။ တော်တော်လေးရယ်ရတယ်။ အခု အဲဒီ အကက ရှားနေပြီ''ဟု အသက် ၃၆နှစ်အရွယ် ရခိုင်တိုင်းရင်း သားတစ်ဦးက ပြောပြသည်။
ငစွေနှိုက်တာကိုကပြနိုင်ရန် လိုအပ်ချက် ၁ဝ ချက် ရှိပြီး ယင်းတို့မှာ မောင်းတစ်လုံး၊ ဝါးဖြင့်ရက်လုပ်ထားသော ရက်သဲ့တစ်ခု၊ ငါးထည့်ရန် ဝါးပလိုင်းတစ်လုံး၊ ဆန်ဖွပ် သည့်ဆုံတစ်လုံး၊ ဆန်ဖွပ်ရန် ကျည်ပွေ့တစ်ချောင်း၊ လှော် တက်တစ်ချောင်း၊ ဆန်တစ်ခွက်၊ ငှက်ပျောသီး၊ အုန်းသီး၊ ကွမ်းသီး၊ ဆေးလိပ်စုံကန်တော့ပွဲတစ်ပွဲ၊ ကပြရန်အသင့် အတင့်ကျယ်ဝန်းသော မြေတလင်းတစ်ခု၊ ဖျာကြမ်းတစ် ချပ်တို့လိုအပ်ကြောင်း သိရသည်။
ငစွေကပြသူသည် ငါးစွေနှိုက်ရန် သူငယ်ချင်းများနှင့် သွားပုံ၊ ငါးရှာရင်း လမ်းမှာ တိုင်းပြည်နိုင်ငံဖြစ်ပျက်ပုံများ၊ လက်ရှိ ရွာရဲ့ဒုက္ခများ၊ နန်းတွင်းဖြစ်နေသည့် ပြဿနာ များကို ရယ်စရာ၊ ဝမ်းနည်းစရာများကို ပေါ်လွင်အောင် သရုပ်ဆောင်ဟောပြောရသည်။ စကားပြောင်၊ စကား ပျက်များနဲ့ပြသသွားသဖြင့် လူများနှစ်ခြိုက်ကာ ယနေ့တိုင် အမျိုးသားယဉ်ကျေးမှုအဖြစ် ရှိနေဆဲဖြစ်သည်။
မြောက်ဦးခေတ်တွင် ငစွေဆရာဘာရဲ့ဘဟု ကျော် ကြားခဲ့သူမှာ မင်းပြားမြို့နယ် ဗူးပင်ရွာသားဖြစ်ကြောင်း သိရပြီး ယင်းငစွေဆရာ၏ငစွေနှိုက်အခြင်း(တေးသီချင်း) များမှာ ယခုအချိန်အထိ ခေတ်စားနေဆဲဖြစ်သည်။
ငစွေအကမှာ ခေတ်အဆက်ဆက် တောရွာများတွင် ခေတ်စားခဲ့ပြီး ယခုအခါငစွေကတတ်သူများရှားပါးလာ ကြောင်းသိရသည်။ သို့ဖြစ်၍ ရခိုင်တိုင်းရင်းသားတို့၏ ရိုးရာယဉ်ကျေး မှုအကတစ်ခုဖြစ်သော ငစွေအကသည် မူလအစမှာ ရည် ရွယ်ချက်မကောင်း
သော်လည်း နောက်ပိုင်းတွင် နိုင်ငံအ တွင်းဖြစ်ပျက်နေသောဖြစ်ရပ်များကို ထင်ဟပ်စေသော ရိုးရာအကဖြစ်လာသောကြောင့် ရခိုင်ဘုရင်များပင် ကြည့် ရှုခဲ့ရသော ယဉ်ကျေးမှုအမွေအနှစ်ဖြစ်၍ ရေရှည်တည် တံ့ အောင်ထိန်းသိမ်းနိုင်ပါစေကြောင်း ရည်ရွယ်ရေးသား ဖော်ပြလိုက်ခြင်းပင်ဖြစ်ပါသည်။
ကျမ်းကိုး-
ရခိုင်သမိုင်းပညာရှင် ဦးရွှေဇံ၊ ရခိုင်သမိုင်းအလင်းပြကျမ်း၊
မေကြီးရှင်၊ ငစွေခြင်း
(ငစွေနှိုက်သည့်အကြောင်းအခြင်းအရာ)ဆောင်းပါး
--
http://www.burmaburo.blogspot.com
No comments:
Post a Comment